सय वर्षीय वृद्धको मतदान गर्ने रहर

 

मोरङ । पछिल्लो स्थानीय निर्वाचन हुँदा मोरङ पथरी शनिश्चरेका मानबहादुर भित्रिकोटी ८५औं वसन्त पार गर्दै थिए । अहिले उनी उमेरले सय वर्ष काटिसकेका छन् ।

मतदान गर्न जाँदा हजुरबाले बोकेर लगेका ज्ञानेन्द्रबहादुर भित्रिकोटी २० वर्षका युवा थिए । मतदानपछि त्यही वर्ष जन्मिएकाको उमेर पनि १८ वर्ष नाघिसकेको छ । पछिल्लो स्थानीय निर्वाचन २०५४ मा भएको थियो । त्यसयता भएको छैन । जसले गर्दा आमनेपालीको मतदान गर्ने इच्छा र चाहना पूरा हुन सकेको छैन ।

मोरङ वयरवनकी दुक्कादेवी राजवंशी गएको स्थानीय निर्वाचनमा ६६ वर्षकी थिइन् । अहिले उनी ८५ वर्ष पार गर्दै छिन् । यी त प्रतिनिधि पात्रमात्रै हुन् । २०५४ मा भर्खर जन्मिएका शिशु जवान भएका छन् । जवान वयस्क भएका छन् भने वयस्क वृद्ध भएका छन् । लामो समयसम्म स्थानीय निर्वाचन नहुँदा मतदान गर्नबाट धेरै वञ्चित छन् ।

२००७ देखिकै परिवर्तनलाई नजिकबाट हेरिरहेका मानबहादुर भित्रिकोटीले मतदान गर्ने तीव्र इच्छा व्यक्त गर्दै भने, “वैशाख ३१ गतेसम्म त अब कसो नबाचौंला । त्यहाँबाट पनि उता सर्यो भनेचाहिँ यसै भन्न सकिँदैन ।”

करिब दुई दशकपछि हुन लागेको स्थानीय तहको निर्वाचनले मतदाता उत्साहित देखिएका छन् । सहर, बजार र ग्रामीण क्षेत्रका चिया पसलमासमेत कुराकानी गर्ने प्रमुख विषय नै स्थानीय तहको निर्वाचन बनेको छ । दलका नेता गाउँ पस्ने क्रम बाक्लिएको छ । आफ्नो महत्वपूर्ण अधिकार प्रयोग गरी जनप्रतिनिधि छान्ने सुनौलो अवसर गुम्ने हो कि भन्ने चिन्ता पनि उनीहरुमा छ ।

जनप्रतिनिधि नभएकै कारण गाउँको विकासले गति लिन नसकेको मोरङ सुन्दरदुलारीका युवा राजीव शर्माले बताए। एउटा सामान्य कामका लागि पनि सचिव खोज्दै सदरमुकाम धाउनुपर्ने बाध्यताले सर्वसाधारण आक्रान्त भएको बताउँदै उनले वैदेशिक रोजगारीमा जाने सबै प्रक्रिया पूरा गरिसकेको भए पनि महिना दिनपछि हुन लागेको स्थानीय तहको निर्वाचनमा मतदान गरेरमात्रै जाने हो कि भन्ने सोचा बनाएको बताए ।

तपाईको प्रतिक्रिया

सम्बन्धित समाचार