हैजाबाट १ सय १५ को मृत्यु

यमन । द्वन्द्वग्रस्त खाडी मुलुक यमनमा फैलिएको हैजाका कारण ११५ जनाको मृत्यु भएको अन्तर्राष्ट्रिय रेडक्रस समिति आईसीआरसीले जनाएको छ ।

हैजाबाट आठ हजार ५०० जना बिरामी परेका र उनीहरुको उपचारका लागि विभिन्न राष्ट्रिय तथा अन्तर्राष्ट्रिय स्वास्थ्य सङ्घसंस्था यमन पुगेका छन् ।

हामीले अहिले हैजाको गम्भीर समस्याका रोगीको उपचारमा सहयोग गरिरहेका छौँ, आर्इसीआरसी कार्यक्रम सञ्चालक डोमिनिक स्टिलहार्टले बताए।

यमनको स्वास्थ्य मन्त्रालयको तथ्याङ्कलाई उद्धृत गर्दै स्टिलहार्टले अप्रिल २७ देखि शनिवारसम्म ११५ जनाको मृत्यु भएको बताए ।

गत मङ्गलवार विश्व स्वास्थ्य सङ्गठन (डब्लूएचओ) ले यमनमा हैजाका कारण ३४ जनाको मृत्यु भएको जनाएको थियो। यमनमा यो वर्ष हैजा तथा दूषित पानीका कारण फैलिने रोगको सङ्क्रमणका कारण ठूलो सङ्ख्यामा प्रभावित बनेको दोस्रो घटना हो ।

यमनमा भएका द्वन्द्वका क्रममा अस्पताल तथा स्वास्थ्य केन्द्रसमेत विस्थापित बनेपछि लाखौँ मानिसले आफ्नो स्वास्थ्य समस्यालाई भाग्यको जिम्मा लगाउन बाध्य छन् । लामो द्वन्द्वले खानेपानी आपूर्ति तथा मुहान दूषित बनेका कारण सफा खानेपानीका लागि सङ्घर्ष गर्नुपर्ने स्थिति रहेको छ । विश्व खाद्य सङ्गठनका अनुसार यहाँका करिब एक करोड ७० लाख मानिसले आधारभूत खाद्यान्न अभावमा बाँच्नुपरेको छ ।

यमनमा सन् २०१५ यता सुरु भएको द्वन्द्वका कारण करिब सात हजार मानिसको मृत्यु भएको छ भने ३० लाखभन्दा बढी विस्थापित बनेका छन् ।

तपाईको प्रतिक्रिया

सम्बन्धित समाचार